Framlína sjúkraflutningamanna - Birkir Árnason

LSS 

 

 

Framlína sjúkraflutningamanna

Við sem sinnum bráðaþjónustu og sjúkraflutningum erum heilbrigðisstarfsmenn og berum þann titil stolt.

Bráðaþjónusta utan sjúkrahúsa hefur þróast mikið síðustu ár og hefur tekið stakkaskiptum frá þeim tíma þegar mest kapp var lagt á að “skrapa og skutla” og koma sjúklingi sem hraðast á sjúkrahús, inn fyrir þröskuld heilbrigðiskerfisins. Í dag leggjum við upp með það að heilbrigðiskerfið mæti á þröskuldinn til þín og er áherslan sett á gæði þjónustu. Geta okkar til þess að vernda líf og heilsu hefur aukist til muna. Greiningartæki og búnaður til meðferðar hafa þróast mikið og leggja þar mikið til en þegar upp er staðið er það mannskapurinn, menntun hans og þjálfun sem mestu skiptir.

Kröfurnar eru miklar og sviðið er breitt, við sinnum öllu frá skrámum að stórslysum og öllu frá svima að sérhæfðri endurlífgun. Það er margt að læra og allt þarf að standa klárt þegar á reynir því þá er hvorki staður né stund til að líta í bók og glöggva sig á fræðunum eða æfa handtökin. Vinnuaðstæður eru vægast sagt fjölbreyttar, oft eru fáar hendur á staðnum og þeim ætluð flókin verk. Við vinnum úti og inni og þjónustan er veitt allan sólarhringinn, allan ársins hring.

Menntunarstig sjúkraflutningamanna á Íslandi fer hækkandi. Mikil fjölgun hefur orðið á háskólamenntuðum bráðatæknum síðustu ár og mikið hefur um leið safnast af reynslu frá öðrum löndum. Það er mikill metnaður í faginu og menningin innan þess er mjög framfaramiðuð. Sjúkraflutningamönnum er annt um framlag sitt til skjólstæðinga og kalla meðal annars sjálfir eftir því að gæði þjónustunnar séu tryggð með aukinni gæðastjórnun og endurmenntun. Þannig viljum við á jákvæðan hátt setja fram fordæmi. Traust almennings til okkar er mikið og við viljum svo sannarlega standa undir því. Það er auðvelt að vilja allt á sig leggja í þessu hlutverki. Mikilvægið er óumdeilt.

Sjúkraflutningamenn eru í framlínu í baráttunni við Covid-19. Nálægðin við sjúkdóminn er mikil. Viðbúnaður hjá okkur er mikill og líkt og hjá svo mörgum öðrum er álagið meira. Rekstraraðilar sjúkraflutninga hafa gert ráðstafanir og hafa ásamt starfsmönnum lyft grettistaki í framkvæmd þeirra. Varnarbúnaður, hreinsun og uppfært verklag í nær alla staði. En því miður er björninn ekki þar með unninn. Faraldurinn sló okkur af fullum þunga og á höfuðborgarsvæðinu einu saman skipta verkefni sjúkrabíla tengd Covid-19 nú orðið hundruðum.

Af Facebooksíðu SHS

Óvissa hefur alltaf verið hluti af okkar starfsumhverfi. Nú bítur hún sem aldrei fyrr. Upplýsingar af vettvangi liggja ekki alltaf fyrir og í bráðatilfellum erum við fyrsta snerting við heilbrigðiskerfið. Við erum alltaf á varðbergi og af góðri ástæðu. Það er alvarlegt mál að missa fólk úr þessari þjónustu í sóttkví en það hefur ítrekað komið fyrir og einnig hafa starfsmenn veikst eftir beina snertingu við smitaða. Við erum útsett fyrir smiti og búum við aukna áhættu á því að bera óværuna með okkur heim til fjölskyldunnar. Þessari baráttu er ekki lokið þrátt fyrir tilslakanir á samkomuhöftum og ef veiran nær sér aftur á strik verðum við með þeim fyrstu til þess að finna höggið.

Við erum heilbrigðisstarfsmenn og stöndum í framlínu með öðrum lykilstéttum samfélagsins. Þetta á við um alla sjúkraflutningamenn á landinu, líka þá sem ekki sinna sjúkraflutningum sem aðalstarfi. Margir sjúkraflutningamenn á Íslandi sinna sjúkraflutningum í hlutastarfi en víða á landinu eru sjúkraflutningar eingöngu reknir með bakvöktum. Hvert svo sem aðalstarf þeirra kann að vera þá er það svo að þegar þau svara kallinu og sinna bráðveikum og slösuðum þá eru þau að sinna heilbrigðisþjónustu.

 

LSS

 

Við viljum minna á að það er til staðar hópur sem stendur vaktina, klár ef þú þarft á að halda. Hópur sem leggur metnað sinn í að hækka þjónustustigið, bæta þjónustuna og aðlagast hratt þegar aðstæður breytast.

Við sem sinnum bráðaþjónustu og sjúkraflutningum sendum ykkur kveðju af framlínunni og vonandi sjáumst við bara sem allra minnst í sumar.

 

Höfundur er bráðatæknir og formaður fagdeildar sjúkraflutningamanna hjá Landssambandi slökkviliðs- og sjúkraflutningamanna